صوْت رصاص يْوِزّ.. وتعلا هالعجقا
جبهة اللي ما بتنام.. ما بتلين
كل يوْم هَوْني عم تنقص الرّفقا
وكل عركي يِنْمحو كمشة سنين..
.. سْمعتا صرختو.. وزّت بِبالي
شلاّل يهدر.. وفجأَ خلصت الْمَيْ
شو حِلوي جبالنا.. وسهرة العالي..
.. غَمَزني.. حرام أندفن بالفَيْ!!
.. كان إلنا البطل.. وسكت تا يرتاح..
دمّ عم يسقي وشو بْجمّع وشو بْلمّ
وصلنا ع بَيْتو.. دمعتي مفتاح
.. بْأيّا قلب رح سلّمو لْ هالإمّ..
.. قالو البطل عن بلادو بيموت..
نور الوطن عم يخلق من قبرو
وأرزاتنا عالتل زنّرن ياقوت
لَوْما سقاهن دمّو ما كِبرو..
مات البطل.. والنّصر والفرحا
عبّو هالدّني.. وكل الوطن عيد
وبالبيْت لْ ما رح تدخلو طَرْحا
وحدا نْكَسر عودا.. إمّ الشهيد!
الثلاثاء مارس 04, 2008 5:50 pm
