ليش مذيعاتنا دائما عندهم نفس الأسئلة؟؟
ليش مذيعاتنا دائما عندون نفس الأسئلة؟؟
ليش كل الشعب حفظان شو هي الأسئلة؟؟
ليش ما بتتغير هالأسئلة؟؟
يعني المذيعة بتروح على شي حديقة أو شي مطرح متجمعين فيه الأولاد الصغار بالعيد.....وبتبلش بالأسئلة الفذة ....:
• اشتريت لبس جديد على العيد حبيبي؟؟؟ يعني شو بتتوقع يقولها؟؟
لأ...ما اشتريت لبس جديد....هادول سرقة من على حبل الغسيل تبع الجيران
ولا ولا بتتوقع يقولها...أخدت لبس أخي الكبير تبع السنة الماضية ولبستو...؟؟
طيب بركي فعلا كان في ولد هيك وضعو....ليش حتى تسألو وتكسرلوا نفسيتو قدام بقية الأولاد
• شو بتشتري بالعيد...شوكولاته وأكلات طيبة؟؟
لا والله...على العيد بشتري 10 غرام حشيش...وبنقعد نصطهج فيهون أنا ورفقاتي.....وبعدين بنأرجل....وبناخدلنا كاسين ....
يعني الولد الصغير شو بيحب يشتري وياكل؟؟مجدرة ولا عدس بحامض؟؟
• شو بتعمل بالعيد احكيلنا حبيبي....بتلعب بالمراجيح؟؟
لأ أبدا...ما بقرب صوب المراجيح....
بالعيد بروح بلعب مصارعة رومانية...وشوية تايكواندو....
• بتلعب مع أصحابك بالعيد؟؟
أعوذ بالله...شو مع أصحابي...أبدا...بنزل بلعب مع شوفيرية التكاسي والزعران...
• احكيلنا ...وين بتروحوا بالعيد إنت ورفقاتك... حبيبي....؟
ما بدها سؤال...على الكباريه...لترين عرق....
طيب مذيعاتنا المهمات...ما عم يلاحظوا كيف الولد عم يتلعثم...وعم يتلبك...وماعم يعرف يحكي...ومالو رايد يحكي....وبلشت تشط ريالتو من العبطة...وما عم يطلع صوتو....وما عبيحكي شي....؟؟؟
هالمذيعة الحنونة هاي....ما عم يطلع من خاطرها تترك الولد بحالو؟؟
ما عم تلاحظ إنو الولد ما بدو يحكي....؟؟
لك اتركيه بحالو
السبت يناير 26, 2008 1:55 pm
